Heilna Duplooy Semiose
die son hou die gesig
daglank op hom gerig
hy krink die geelgesoomde kop
die swart oog hou hom dop
die blom word teken van die son
geel en oker geknakte ikone
merk ‘n moeisame lewenstog
elke bonkige sonneblom
is teken van van Gogh
die suising van die sterre
word deur die oorskulp ingesuig
die kosmos swik, swik en kantel
soos die kurwe van die kraakbeen buig
die oor, vermink, word indeks van verrukte dink
aan elke kolk van kleur
is hy wankelend verknog
elke ferm kwashaal verf
is triomfantelik Van Gogh
© 2000 Heilna Duplooy / De Gekooide Roos
Over Heilna Duplooy
Heilna du Plooy (1947, Pretoria) is professor in Afrikaanse en Nederlandse letterkunde en literêre teorie aan die Potchefstroomse Universiteit. Sy het gepromoveer met 'n proefskrif getiteld "Verhaalteorie in die twintigste eeu" (1985) en skryf gereeld akademiese artikels oor Afrikaanse letterkunde in Suid-Afrikaanse en ook Nederlandse vaktydskrifte. Sy het verskeie kortverhale gepubliseer in literêre tydskrifte en 'n digbundel "Die donker is nooit leeg nie" in 1997. Sy en haar man woon in Potchefstroom en het vier kinders.
Heilna du Plooy op