Heilna Duplooy Benoeming
Voor wie ik liefheb, wil ik heten.
(Neeltje Maria Min)
Die sagte sein is uitgestuur
en tril die ruimte in,
dit is uit donker water voortgebring
die water wat van late liefde sing.
Jy is die kurwe van die radarboog
waarin die sagte sein ryk resoneer.
Jy vang my op en stuur my uit—
skottel
skottel
satelliet—
’n vonk in die verskiet
en ek is klein verruim.
Ek gaan hier by jou voete sit
my kop net by jou hand
en sonder om jou aan te raak
vra ek aandagtig, langsaam:
Gee my nou ’n ander naam.
© 2000 Heilna Duplooy / De Gekooide Roos
Over Heilna Duplooy
Heilna du Plooy (1947, Pretoria) is professor in Afrikaanse en Nederlandse letterkunde en literêre teorie aan die Potchefstroomse Universiteit. Sy het gepromoveer met 'n proefskrif getiteld "Verhaalteorie in die twintigste eeu" (1985) en skryf gereeld akademiese artikels oor Afrikaanse letterkunde in Suid-Afrikaanse en ook Nederlandse vaktydskrifte. Sy het verskeie kortverhale gepubliseer in literêre tydskrifte en 'n digbundel "Die donker is nooit leeg nie" in 1997. Sy en haar man woon in Potchefstroom en het vier kinders.
Heilna du Plooy op